濕紙巾係唔少媽媽及對潔淨清潔度要求高嘅人隨身物。大家喜歡用濕紙巾，主因貪方便，清潔時，尤其抹走一些帶油帶黏性或厭惡物，比用乾紙巾乾淨得多。愈方便嘅嘢大家用得愈順手，用完即棄，以為一了百了，其實不知不覺污染緊地球，破壞環境。
不織布難分解
濕紙巾賣點係濕身但堅韌，如果真係紙，點可以做到？其實濕紙巾唔係濕咗嘅「紙巾」，大部分係不織布，成分唔係紙亦唔係棉，而係塑膠，難以生物分解。但有人會話，明明見到張濕紙巾有細小嘅纖維，生產商又話係植物纖維造。事實係商人喺不織布混入特別物料，增強其柔軟感。
好多人錯誤以為濕紙巾係紙，可回收可分解，於是隨拋棄。最錯一個行為係將濕紙巾掉到馬桶去。再強調一點，一般濕紙巾唔係紙，掉到馬桶，水流沖不爛，便會塞住喉管。雖然近年市面推出聲稱「可以掉入馬桶」嘅濕紙巾，以特殘紙纖造，但為保持濕紙巾嘅堅韌和耐用度，都會加入塑膠。無錯，呢類濕紙巾係可以掉入你家嘅馬桶，然後沖走，但城市裡嘅污水系統並非為消化呢類濕巾而設計，結果濕紙巾進入污水系統後，就造成麻煩。
污染海洋
另外，含塑膠嘅濕紙巾進入海洋後，需要很長時時間才可以分解，也為海洋生態造成災難，部分海洋動物誤將呢啲垃圾食落肚而致死。英國倫敦泰晤士河床底長年堆積大量濕紙巾，原因係當地排水系統太舊，要定期排洪。排洪時污水未經處理，連同垃圾流入泰晤士河。曾有研究指出，當地造成下水道堵塞嘅物質中，逾9成係濕紙巾，另一個令人關注係濕紙巾與油脂結合而成嘅油脂體，唔止難清走，而且當中含有傳染病菌，甚至可奪命嘅抗生素耐藥性病菌，如污水流到其他地方。將對公眾健康構成威脅。英國政府注意到濕紙巾帶來的問題，早已計劃喺未來25年逐步禁售濕紙巾。
含防腐抗菌劑
污染值得關注，可以唔用當然最好唔用濕紙巾，但一定要用呢，都要識揀喎！試諗下，濕潤嘅紙材質放喺包裝內可以長期保持品質唔發霉而且無菌，原因係乜？家中嘅毛巾若果濕咗無晾乾，都會發臭生霉。睇下濕紙巾包裝寫上嘅成分，列出只有純水和不織布，你覺得係真嗎？濕紙巾含高量水分，加上部分出廠前沒經滅菌，部分又非每片獨立包裝，而是一大包供反覆抽出使用，當濕紙巾不斷接觸空氣或不潔的雙手，若不添加適量的防腐劑或抑菌劑，一定會長菌發霉吧。廠商不標示，明顯係不盡不實，大家選購時要考慮清楚。
至於常見加在濕紙巾的防腐劑或抑菌劑包括親水性的羥基苯甲酸酯、山梨酸、檸檬酸、笨氧乙醇、笨甲酸鈉等。就算係屬獲准使用嘅物質，但長期接觸呢類化學物，都唔理想。尤其好多愛錫子女嘅爸媽會用濕紙巾幫BB抹嘴抹手腳抹pat，BB肌膚幼嫩，有機會受刺激而出現敏感。另外，在挑選濕紙巾時，最好不含香料、色素、精油等，以免過敏。若皮膚有傷口，為安全計，最好不要觸碰濕紙巾。
你或會有興趣的相關文章：
香港海底垃圾多花款 鬼網成隱形殺手
綠色膠樽可口可樂 全球首用海洋垃圾造膠樽
TEXT: MaryLin