5款高糖健康食品陷阱 以為食得健康其實中晒伏| likemagazine.com.hk
Beauty & Health
6款健康食品陷阱		睇落健康其實有糖架!

5款高糖健康食品陷阱 以為食得健康其實中晒伏

食糖多對身體唔好,常識吧!近年潮興飲食健康,無論食飯或買杯飲品盡量少糖或走糖。按世衞建議,成人每日糖攝取量最多25克,即大約6茶匙。雖然好多人飲食比以前檢點,但始終一日流流長食嘢何其多,累積計起嚟依然多。衛生署曾在20142015年度進行人口健康調查,結果發現年齡1584歲的香港人,近五成人超重、肥胖及患有高膽固醇血症,近28%患上高血壓,超過8%人患有糖尿病。日常飲食裡好多睇落健康嘅食物飲品其實都含糖量高,唔想減糖行動失敗,喜歡以下幾款食物/飲品嘅你要注意!

 

1 乳酪

基本上,乳酪係健康食品,不過為增添可口及吸引消費者,廠商添加糖或經處理嘅水果粒,結果由健康變重糖,部分乳酪含糖量可能比一條朱古力條更多。而且部分聲稱低脂低糖嘅產品,其實所謂嘅「低」不過係同佢之前相同產品嘅配方相比,分分鐘依然高糖含量,無睇清楚就中伏。食乳酪又要健康真低糖,建議避免買加味或低脂,原味乳酪最好。若嫌原味難入口,可以自行加新鮮水果粒或加適量嘅蜜糖、楓蜜等,增添美味。

 

2 燕麥穀麥片(Granola)

齋食乳酪味道太單調,所以有人會加料。好多人都知道粟米片糖份多,以為燕麥穀麥片Granola會健康啲,不過都係錯。原來半杯Granola含糖量可以超過12克,問題又係出於為大家食得可口,廠商會喺燕麥穀麥片加糖。所以燕麥穀物食品,無糖永遠係智選,但都唔等於可以完全避免糖攝取,微量糖少不了。要口感又要健康,建議加果仁碎,最天然。

 

3 運動飲品及果汁

運動後見口渴,有人鍾意食運動飲品,一心諗住瞬速解體渴,點知不知不覺飲多咗糖落肚。市面上嘅運動飲品入口都是甜甜地,因為加咗糖,而且含糖量頗高,1樽幾乎有5茶匙糖。另外,有人以為飲果汁好健康,但事實又令大家失望,雖然某方面係健康,但論含糖量,果汁超晒標。例如橙汁,一杯含約10茶匙糖,比得起一罐汽水。下次做完運動見口渴,始終飲水最好。真係忍唔到口要飲果汁或運動飲品,營養專家建議加入氣泡水(seltzer),減少糖攝取量,並帶來有氣口感。

 

4 沙律

沙律本身係健康食品,如果只有菜蔬,唔加任何調味的話。如果見到寫住低脂,更加唔可取,因為通常減脂便會加糖,保持美味。調味係糖分主要來源,常用嘅意式沙律醫每2湯匙含約2克糖;千島醫更高達6克。食沙律要健康減糖攝取,走醬吧!要加味?可以試下添檸檬汁或橙汁,天然美味。

 

5 茄汁

有外國人飲食習慣乜都加茄汁,而我哋呢?似乎對茄味食品情有獨鍾,可能因為酸酸甜甜好好味。但係你知道嗎,好多餐廳嘅茄乜茄乜食品都係用大量茄汁煮成。茄汁含糖量超高,而且為使加入茄汁嘅食物可口,廚師都習慣加入大量糖平衡茄汁嘅酸味,結果糖本來多,再加多。一湯匙茄汁含有約1茶匙糖,大家諗諗食一個茄乜乜飯,食咗幾多糖落肚。

 

你或會有興趣的相關文章:

減磅要飲呢啲!Tonic Water唔係水!

唔食飯減肥會短命  多攝植物蛋白脂肪補充

 

 

TEXT: MaryLin

相關文章
向日本OL偷師!纖體美肌首選小球藻向日本OL偷師!纖體美肌首選小球藻 晨早起床做瑜伽│新一天由陽光好心情開始晨早起床做瑜伽│新一天由陽光好心情開始 習慣對不好的事批判│感恩靜心練習 回到喜悅習慣對不好的事批判│感恩靜心練習 回到喜悅 打造超強體質!小球藻 護好「腸道」,排走「重金屬」, 補充「均衡營養」!打造超強體質!小球藻 護好「腸道」,排走「重金屬」, 補充「均衡營養」! 最近難入眠瞓得唔好?│睡前瑜伽提升睡眠質素最近難入眠瞓得唔好?│睡前瑜伽提升睡眠質素 在家工作的瑜伽Break | 大腦放鬆身體動起來 在家工作的瑜伽Break | 大腦放鬆身體動起來 恒常做站立前彎練習 | 舒展筋骨平靜身心恒常做站立前彎練習 | 舒展筋骨平靜身心 月經期間的紓緩練習 | 靜心調理經期緩腰痛月經期間的紓緩練習 | 靜心調理經期緩腰痛