網訂酒店留意5大伏位 推銷手法層出不窮精明睇真啲| likemagazine.com.hk
Travel
網訂酒店留意5大伏位	推銷手法層出不窮精明睇真啲

網訂酒店留意5大伏位 推銷手法層出不窮精明睇真啲

近年自助旅遊愈趨普及,連師奶阿叔都識上網訂機票、book酒店,唔使再去旅行社問。雖然網上訂好方便,不過騙案或出現貨不對辦情況都愈來愈多,特別係上網訂酒店,其實好多伏位。唔想做羊牯,消費要精明,擘大對眼睇清,更重要係唔好咁易被語言藝術或行銷技巧蒙蔽,出遊就稱心又開心。

 

1 得番一間房未必係真

上酒店網訂酒店,當選定心儀酒店及房間後,或者你都試過見到pop-up,提你呢間酒店只剩一間房,即時緊張起嚟。若果心急就有機中計。因為所謂「剩一間房」,可能只係話呢個酒店網受權接受預訂嘅房間數目只剩一間,未必係成間酒店只剩一間房。當然酒店網想做你生意,唔會咁坦白話你知,所以當見到「剩番一間房」、「過去x小時/分鐘內有x人訂房」提示,可作參考。當然喺旺季時間,酒店房供應緊張,手快有手慢無。

 

2 連結網站非官方

消費者明白知多啲係醒啲,所以有時都想click入酒店自己個網站,了解多啲先決定訂唔訂房。喺酒店網瀏覽時,見酒店資料內有網頁,順手一click,以為會直接轉到酒店官方網,但原來未必架!有可能係連結去其他第三方網站,所以一定要睇清楚,如有疑問,直接打去酒店確認會更好。

 

3酒店房資料跟真實誤差

酒店網雖然盡力羅列酒店房間各項資料及規定,但有時陳列方式有機會受酒店網嘅格式或資料處理方式等所限,而出現唔係百分百反應事實真相。例如最常見係酒店房型和可容納人數最容易出現爭拗。舉個例,消費者用3人入住搜尋,得出結果未必一定係有3張床嘅房間,有機會係可加床的雙人房或者內有梳化可當床嘅雙人房。有時酒店網寫某種房型可容納X人數,但酒店官方未必容許。強烈建議大家揀選酒店房間時,最好花少少時間去官網fact check 一下。

 

4 優惠有附帶條件

酒店網個個推銷手法不同,有啲價格網嘅酒店房價連稅及手續費,有啲唔包括在內。要慳到最盡要睇真。另外,酒店網不時與銀行及信用卡合作做推廣,只要用指定promotion code便享折扣,但留意,有時要用到呢個code必要經指定連結登入。伏位就係呢度,用指定連結搜到嘅酒店房價有可能同你就咁登入網站搜到嘅唔同。經指定連結,揀好酒店,用埋code,都未必真係平過你用其他方法登入。有啲酒店玩法更特別,以會員身分登入所得房價跟正常登入不同,以為用會員再用code平更多?sorry,優惠不能同享。或者你揀嗰間酒店根本唔可以用code。總之玩法層出不窮,俾錢時要睇清楚。揀好酒店,網上付款時,一定要留意係咪安全付款網站。在網址欄上,見到有個「小鎖」圖案,以及網址係「https://」開首,就表示網站伺服器嘅連線經過加密技術,傳輸資料唔會咁易被竊取。付款後,建議立時查下銀行賬目,確定資料數目正確。如有任何懷疑,唔好怕煩,打電話去銀行問下。

 

5 價格最平有前設

做生意當然想做成生意,所以會用唔同花招,其一係「優惠」。酒店網成日宣稱自己房價已係格盡天下,之前都有報道及機構踢爆,最平唔係真係最平,所謂最平喺有設定範圍,甚至符合指定條件。所以咪見到「優惠」、「特價」、「最平」就發晒狂另外,咪以為經酒店網一定平過酒店官方網,有時酒店自己會推出特別優惠package,分分鐘仲抵。所以呢,精明消費者係要付出嘅,喺商業世界有用金錢換時間定理,明白未?

 

 

TEXT: MaryLin

相關文章
夏遊東京不止shopping                        茨城公園賞滿丘綠色可愛小草球                    夏遊東京不止shopping 茨城公園賞滿丘綠色可愛小草球 京都特色酒店富禪意      限定活動體驗古都文化京都特色酒店富禪意 限定活動體驗古都文化 次次去旅行追行程追到氣咳    2020年旅遊潮流歎慢板次次去旅行追行程追到氣咳 2020年旅遊潮流歎慢板 豐隆保險迎合用家需要              網上投保索償方便省時豐隆保險迎合用家需要 網上投保索償方便省時 日本人最愛北海道        11年稱霸京都府輸條街日本人最愛北海道 11年稱霸京都府輸條街 日本趣怪玩具:立體燒雞砌圖|仲教埋你點劏吞拿魚!日本趣怪玩具:立體燒雞砌圖|仲教埋你點劏吞拿魚! 今年新增荷蘭工作假期              最長逗留1年深度探索荷蘭        今年新增荷蘭工作假期 最長逗留1年深度探索荷蘭 台北人氣特色cafe打卡清單台北人氣特色cafe打卡清單