路不拾遺係美德。若喺街執到個銀包，你會點做呢？有心人會睇下銀包內有無銀包主人嘅聯絡方法，有嘅就盡快物歸原主。萬一無呢？除咗交去警署之外，外國有個有心人就諗到妙法。話說英國有個上班族大頭蝦跌咗錢包，有好心人執咗後，喺銀包搵唔到任何聯繫方法，佢為咗搵到銀包嘅主人，於是用咗一個超級迀迴嘅方法，就係銀行轉賬。有心人藉住每次銀行轉賬時可以加入備註呢個功能，將訊息留給銀包主人。銀包主人因為唔見咗銀包，為防止被人盜用戶口，打算報失銀行卡之時，順手查下戶口，結果見到幾筆古怪嘅0.01英鎊轉賬。轉賬都發生喺佢唔見銀包之後，起初佢抓爆頭唔明發生咩事，但細心睇，留意到每筆轉賬都有備註，將多條有限字數嘅備註合起來，發現係有心人留下訊息和聯絡電話。就係咁，銀包最終物歸原主。有心人話，執到銀包時知道銀包主人叫咩名，本來想用facebook尋人，但因為呢個世界太多人同名同姓怕搞錯，本來有諗過交去警局，但靈機一觸，諗到用轉賬呢個好方法，結果用咗1個多小時就聯上物主。
TEXT: MaryLin