新出和風口味雪米糍味道不止甜仲勁薑！

Focus 2019-08-02

每到夏天，雪糕品牌都會搞新意，推出新口味。Josi小編最近收到維記牛奶送來新推出的烤黃豆粉薑母雪米糍，味道唔係大路人人鍾意的水果或甜點口味，有啲估佢唔到，同事見到都滿頭問號。既然唔係幻想得到的味道，唔講咁多，試咗先講。雪米糍外皮依舊煙韌，皮夠薄，先畀個like。糯米皮加入濃郁薑母粉，入口「勁薑」，感覺似食緊薑汁湯圓。內裡是黃豆粉雪糕，味道正常，沒有意外也沒有太大驚喜。整體而言，呢款雪米糍畀人感覺和風，原意是想人有日本黃豆粉蕨的感覺，但食落，反而似食緊中式糖水薑汁湯圓。近年愈來愈多女生戒生冷嘢，怕寒涼，加入勁濃薑母粉的雪米糍，薑可驅寒，唔知會唔會畀到貪吃又要養生的女生一個偷食雪糕的理由呢？烤黃豆粉薑母雪米糍即日起至8月31日於維記Pop Up Store優先發售，及後9月起於在7-Eleven及Circle K便利店都買得到。

雪米糍外皮加入濃郁薑母粉，入口「勁薑」，內裡是經烘焙的黃豆粉雪糕。雪米糍是和風口味，但入口反而覺得似食緊凍的薑汁湯圓。