7個報稅時可能遺漏旳扣稅項目| likemagazine.com.hk
Special

7個報稅時可能遺漏旳扣稅項目

每年到了呢個月份,打工仔特別愁,因為要愁報稅!「綠色炸彈」早已收到,但打開份表,見到咁多個「窿」心都煩晒,遲遲唔想填。就算你十萬個唔情願,提提你,報稅表必要在指定日期前提交。個人人士報稅限期是62日。交稅是公民的責任,不過人人都想錢放在自己口袋,有乜方法可以交少啲呢?重點就係用盡免稅額和可扣稅項目,唔好蝕畀政府!剛出來打工的年輕人,唔熟報稅,除咗個人入息免稅額外,以下幾項你又知唔知原來可以免稅或獲稅務扣除呢?

 

 

 

1/ 個人進修開支

常言道,機會留給有準備的人。部分打工仔非常積極進取,工餘會自發去讀書進修。若果你是其中一份子,而修讀的課程或報考的考試屬於「訂明教育課程」,而所交的學費或考試費並未或將不會獲僱主或任何其他人付還,便可用作扣稅。

 

2/ 慈善捐款

施比受更有福,平時你都有捐錢做善事嗎?只要你捐出的款項不少於$100,而善款受助者是香港免稅慈善團體或政府,並有收據作證明,你便可將捐款作扣稅。但注意一點,扣除額不得超過該年度的入息減去扣除支出及折舊免稅額後的35%。換句話說,就算你超善心勁捐款,每個月捐晒成份糧,都唔等於你可以完全唔使交稅!只係可以扣減部分,等你交少啲!

 

3/ MPF供款及年金供款

政府為咗令大家早啲起步計劃退休,於2000年實施強積金制度。自此之後,每月入息高於$7,100或每年$85,200的打工仔,每個月出糧就要強制性將入息的5%或上限$1,500用作供強積金。呢筆錢其實可以扣稅,填報稅表時,記住唔好漏!另外,本年度起,繳付合資格年金保費和作出可扣稅強積金自願性供款,都可獲稅務扣除,兩項合計最高扣除額為$60,000

 

4/ 供樓利息

近年「上車」成為社會熱話,為了擁有「磚頭」,晉身人生勝利組,好多人千方百計,甚至孤注一擲。若果你有幸在本年度內「上車」,而且有做按揭貸款,記得已支付的利息可以扣稅。

 

5/ 自願醫保

睇電視,日日被「玲玲姐」疲勞轟炸,叫人投保自願醫保,因為可以扣稅。除咗自己嗰份自願醫保費可以扣,若果你幫親屬,即配偶、子女、你或你配偶的兄弟姊妹、父母、祖父母或外祖父母交自願醫保保費,一樣可以扣稅。每名受保人每年稅務扣減的保費上限為$8,000。不過都唔係完你肯畀就可以扣,受保人要符合條件先得,例如最基本必須有香港身份證;如親屬係子女或你/你配偶的兄弟姊妹本年度未滿18歲,或者夠18歲未滿25歲但係全日制學生,又或者滿18歲但身體或精神問題而無能力工作。至於親屬為你或你配偶父母/祖父母/外祖父母,在本年度要年滿55歲或者合資格領取傷殘津貼。呢項扣除將適用於2019/20暫繳稅及其後的課稅年度。

 

6/ 供養兄弟姊妹

一般家庭供養子女擔子通常由父母承擔,但家家有本難念的經,可能供養兄弟姊妹責任落在你身上!如果你在本年度內要供養兄弟姊妹未滿18歲;或者夠18歲未滿25歲但讀緊全日制;又或者滿18歲但有身體或精神病患無能力工作,而且是未婚,你就可得兄弟姊妹免稅額。

 

7/ 供養父母、祖父母、外祖父母

百行以孝為先,孝感未必動天,但本孝供養父母、祖父母、外祖父母,則可得免稅額。簡單而言,只要你供養的父母、祖父母、外祖父母通常在香港居住,年滿55歲,至少連續6個月同你同住,或你/你配偶每年付出唔少於$12,000供養佢哋,就可以得到呢項免稅額。若果你全年連續父母、祖父母、外祖父母同住,更可獲額外免稅額。要留意是,每名受養人只可以由一名人士申請免稅額。如果你有兄弟姊妹,佢哋都要報稅,咁大家就要協議好,免稅額由邊個申索,千祈唔好重複呀!

 

 

以上要點只供大家參考。若要了解清楚有關免稅的條件或準則,建議大家填寫稅表前,參考報稅表指南。https://www.ird.gov.hk/chi/pdf/bir60_cguide.pdf

 

 

TEXTJosi Yan

如有任何旅遊、飲食、購物著數優惠、玩樂、美容或健康等資訊,歡迎大家報料給編輯部小編啊~~

editors@likemagazine.com.hk

相關文章
荃灣一站式親子吃「學」玩樂 預購 《吉卜力的動畫世界》門票 平日入場低至55折 朗豪坊LEGO Star Wars20周年紀念展 蜘蛛俠聯乘郭錦記推平安包禮盒 暑假親子睇舞劇《小黃鴨》 無懼困難發揮獅子山精神 海洋公園海賊王夏水戰 入場打卡兼搶買主題精品 荷花BB展掃貨黃金機會 編輯推介必買抗菌清潔品 周日親子同遊香港海事博物館 輕鬆認識香港航運發展