尖東時尚冰室回味經典鐵板雜扒| likemagazine.com.hk
Shopping

尖東時尚冰室回味經典鐵板雜扒

近來外出同家人友人吃飯,席間成日有人呻:「啲味道唔同晒,好難搵番以前嗰種味!」到底真係味道變咗?食材變咗?煮法變咗?味蕾變咗?用餐心情變咗?甚至其實係人變咗?或者……種種可能都有吧!點都好,若果突然想懷一下舊,食到以前的味道,大家可以試下呢一間。在於尖沙咀漆咸道南「三餐冰室」,老闆Sam的家人在沙田瀝源邨經營茶餐廳「蘭香閣」已40多年,佢對「以前茶餐廳陣味」可以話非常熟悉。今次經營「三餐冰室」,佢話目的之一就是「想大家食到以前細個食到嗰種味。」雖然唔係話以前味道未必係最好,但嗰種味道陪住成長,好熟悉,好多人每次食到,自然有種開心滿足感,即係好似外國人所講的「comfort food」。餐廳命名「三餐」,意思只供應三餐,即午餐下午茶餐和晚餐,暫時未有早餐供應。而「冰室」就是闖著懷舊而來,令人一睇就知呢間餐廳有乜食。

 

餐廳門口一列鐵皮信箱,加強懷舊感。

餐廳一角牆上有幅插畫,如果是「沙田友」,一眼便能認出畫中的是瀝源邨,三餐冰室的根。

餐廳裝修沒有刻意扮舊,基本上是新派時尚格調,但都有融入一些兒時住屋邨回憶元素,例如掛上西瓜波改裝的燈飾,天花有跳飛機的繪圖等。

 

 

茶記在好多人回憶中,除咗有杯靚茶外,還有烘得香脆的多士或烘底三文治。Sam推介大家一試下午茶供應的「香蔥厚蛋鹹牛肉三文治烘底」。鹹牛肉炒蛋三文治是經典茶記美食,惹味的罐頭鹹牛肉碎配合軟滑仍有蛋汁的厚炒蛋,完美的味道配搭。特別加入香蔥, 既為味道帶來一點清新感,而且香蔥和炒蛋向來都是經典配搭。三文治的亮點是烘底麵包,表面金黄香脆,但咬下內裡仍有麵包的軟香。

 

香蔥厚蛋鹹牛肉三文治烘底,炒蛋火喉剛好,仍有蛋汁。拌入鹹牛肉的炒蛋,更加入香蔥,加添一點清新感覺,中和膩感。下午茶餐跟熱飲,$38

 

住屋邨長大的一群主要是基層,偶爾獲父母豪一餐,帶到餐廳「鋸扒」,嗰份滿足和快樂,一世記得。特別要試「鐵板雜扒餐」,超經典!先講個羅宋湯,睇見湯面的橙色油,回憶即時返晒嚟!雜菜煲到焾晒,鹹中帶點酸,就是小時候認識的羅宋湯。另一特點是湯落重本,加入牛肉粒熬製,呢陣肉味是港式羅宋湯的靈魂,今日很多茶餐廳為省成本都不加肉,所以味道完全不同。再來是雜扒的組合,太陽蛋、腸仔、火腿扒、煙肉、豬扒、雞扒,大堆頭,大滿足。重點是墊底的薯菜,用上波浪紋薯條,呢個係港式茶餐廳的經典。汁醬方面,可選黑椒汁、洋蔥汁、燒汁和蒜蓉汁,把汁醬澆在熱辣辣的鐵板上,沙沙聲,伴著油花四溢,小時候有機會食到雜扒,多為慶祝,是一家人開心的回憶。餐飲方面,推介大家點可熱檸檬可樂煲薑,港式滋味,又可舒緩患感冒之不適。

 

鐵板雜扒餐($118),份量十足,當中的太陽煎蛋和火腿扒,很多餐廳早已放棄在雜扒中加入。羅宋湯加配多士、洋蔥汁、熱檸檬可樂煲薑,$126

羅宋湯重本加入牛肉熬,濃郁味道,就是小時候食到嗰種。

 

茶餐廳另一個經典名食,就係焗飯。呢間餐廳焗飯選擇有好幾個,各有捧場客,不過數到最人氣的,一定係「經典焗豬扒飯」。橙色的番茄汁,微酸香氣,刺激食慾。豬扒軟腍入味,厚度適中,雖非厚切,肉感不及某連鎖快餐店,但小時候食到嘅就係呢款。飯面滿滿芝士,熱到可拉絲。

 

經典焗豬扒飯$72

 

茶餐廳飯類中,有一款簡單到不得了,製作好似求其無乜特別,但味道獨特,偶爾總令人好想食的,就係豉油餐肉煎蛋飯!呢間冰室將豉油餐肉煎蛋飯upgrade,變成「三餐三蛋飯」,3隻太陽蛋加3片煎得金黃焦香的午餐肉,食時先澆豉油,然後將蛋黃搗爛,蛋汁混入豉油飯中,茶記獨有滋味。傳統茶餐廳多用圓罐午餐肉,但呢間改用方罐,因為肉感較強,食味更佳。但保留傳統是煎得非常香,午餐肉的香,就係呢個飯最大的誘惑。

 

三餐三蛋飯,全日供應,$56(午餐時間中午12時至下午5時半,$52)

 

 

 

INFO

三餐冰室

地址:尖沙咀漆咸道南115號地下

電話:2130 9302

 

 

 

 

TEXTJosi Yan

如有任何旅遊、飲食、購物著數優惠、玩樂、美容或健康等資訊,歡迎大家報料給編輯部小編啊~~

editors@likemagazine.com.hk

相關文章
Power Living觀塘陳列室一站買最潮最好玩 一幻拉麵慶登港1周年 食套餐送BRUNO限量瓷碗 全球300隻! 一田優惠日Character寢具低至16折 3.14是π又是Pie Day 麥記$3.14歎個批 試埋限定野莓吉士批! 超級英雄銅鑼灣列陣 迷你兵放「蕉」迎夏 UNIQLO全新Minions UT系列 3/3網站率先賣! 牛角 X 龍珠超 經典情景變期間限定菜式 仲有限量精品要儲啊! UNIQLO 出新Tee慶英雄回歸