新蒲崗足料小盅雲吞雞 百款小菜可點半份| likemagazine.com.hk
Shopping

新蒲崗足料小盅雲吞雞 百款小菜可點半份

兩口子出街食飯,本來sweet sweet,但兩人加埋食量始終有限,特別是中菜,不能點太多,否則實做「大嘥鬼」。小編在新蒲崗發現了一個非常適合兩口子食飯的地方,小菜可以叫半份,每款$19起,叫埋招牌的雲吞雞,兩口子一餐5道菜,食得豐富又經濟,兼免收加一。

 

「嫲嫲雲吞雞」開宗明義專賣雲吞雞,雲吞雞款式都有好幾款,包括椰子雲吞雞湯、花旗參螺頭雲吞雞湯、蟲草花雲吞雞湯、雪梨雲吞雞湯、翅頭螺肉雲吞雞湯及姬松茸雲吞雞湯,一律$49 / 盅,價錢吸引。小編當晚揀咗滋補的雲吞雞湯,用料十足,裝到個燉盅滿滿,大大隻雞髀肉,雲吞有兩粒,姬松茸都有好幾粒,坦白講,細食女生,叫一盅當一餐飯都夠晒。順帶一提,雲吞雞湯只限晚市供應,而且部分款式好快沽清。

 

飲完湯,來到主菜。兩個人叫小菜,最頭痕係樣樣想食,可惜胃納有限,最慘普遍人都有選擇困難症,所以對住個菜譜揀極都極唔到。呢間小店的賣點係涼菜和小菜全部可以點半份,等你可以多試幾味。涼菜加小菜,款式過百款,主要是京、川、滬菜,但也有新派及一些家常口味,例如:黃金豆腐、漁香茄子、麻醬肉排、蝦籽什菌等。小編當晚揀咗鹹肉百頁蚊津白、黃金四季豆、黑醋小排骨,全部要半份。

 

鹹肉百頁蚊津白是經典上海菜,基本上好少失手,呢個味道正常,津白沾上鹹肉的鹹香,清淡得來不會太味寡。

 

黃金四季豆絕對要大力推!黃金即係鹹蛋黃,蛋黃推到起晒沙,還要熱辣辣,正到無朋友!黑醋小排骨都係上海菜,遠遠都聞到黑醋的酸味,未食已經好醒胃,是送飯不二之選。特別一讚係菠蘿大大粒,配菜都畀足料,誠意可嘉。

 

小菜配白飯,經典配搭。若果唔想食飯,可以點炒粉麵。在菜譜上,竟然見到沙嗲牛肉粗炒!上海粗炒試得多,沙嗲搭牛肉,已經眼前一亮,還要配粗炒,點都要一試。果然,極重口味,個人覺得偏鹹咗少少,但愈食愈想食囉!愛沙嗲之人要試,食厭粗炒的都要試!

 

 

 

INFO

嫲嫲雲吞雞

地址:新蒲崗崇齡街67-69號崇齡大廈地下7號舖

 

 TEXT: 黎力勤

如有任何有關旅遊、飲食、購物著數優惠、玩樂、美容或健康等資訊,歡迎大家報料給小編啊~~

editors@likemagazine.com.hk

相關文章
創意班尼迪蛋4色海鮮配搭 Power Living觀塘陳列室一站買最潮最好玩 美心 x Hello Kitty打卡先吃 Furla Hello Kitty新系列加入My Melody 杏花新城運動服劈價最平$99 超級英雄銅鑼灣列陣 韓牌UNIX AIRSHOT風筒 千萬負離子瞬間乾髮直髮 Smartech智能蒸烤焗爐入廚滿fun