Pancake配和牛海鮮？新食法男友陪食都有食神 | Gram銅鑼灣店開幕

購物 2019-01-30

自從日本pancake風吹到來香港，女生們終於不用山長水遠飛去日本搵「幸福」！其中一間攻陷港女心的日本人氣pancake店gram cafe & pancakes，繼去年在尖沙咀開店後，成為長期見人龍的食店外，今年再下一城，在銅鑼灣開設旗艦店。將於2月3日開幕的新店，除了有女生最愛的甜味厚班戟外，還推出鹹食班戟，顛覆傳統班戟概念，勢要一班陪女友來的男生都有口福，唔使齋睇陪食！

班戟店是女生的朝聖地，gram cafe & pancakes新店當然要先照顧呢班忠實fans。超人氣Premium pancake，3層厚厚班戟好似梳乎厘一樣咁柔滑，加上楓糖漿和牛油，以及軟滑的忌廉，完美配搭，難怪女生試過便愛上。呢款班戟採用日本空運材料即叫即造，每日只於上午11時、下午3時及6時供應，每時段20份，先到先得。

即使未能試到呢個經典招牌班戟，一眾女粉不用失望，新店準備了新口味給大家細味品嚐。焦糖蜜桃朱古力慕絲班戟($108)，一次滿足愛朱古力又愛班戟的女生願望。班戟的朱古力味都幾重，配以用比利時朱古力造的慕絲，啖啖朱古力香甜。伴碟有士多啤梨和經過輕烤的蜜桃，在甜以外帶來一點果香，女生應該like。

好多人一直認定班戟一定是甜食，其實將之變鹹，一樣掂！gram cafe & pancakes新推出的意大利黑松露醬虎蝦班戟($138)，不但將班戟換上鹹味，還將之變成主菜！因為用上松露醬烹調，班戟上枱時香到不得了，食慾大增。越南虎蝦都幾大隻厚肉，味道鮮甜。墊底的班戟保持鬆軟可口，同樣是澱粉質，取替白飯，一樣飽肚，食味有新鮮感。班戟粉在熱板上畫花製成的班戟網，好似魚網網住虎蝦，賣相有心意。

創新推出鹹味班戟，口味點只一款咁少？另一款應該更容易討好男生心的是日本和牛班戟($48)，用上飛驒和牛，牛肉打成肉碎製成漢堡扒，牛味醇厚，肥瘦剛好，入口即溶。兩片薄身班戟像口袋包著和牛，還有車拉芝士、新鮮蔬菜和番茄，拌以日式沙律汁。整體感覺其實是漢堡包的變革版，把麵包變為班戟。日本和牛班戟只限外賣，所以好啱飯餐喜歡食快餐漢堡的男生，新口味加添新鮮感。