點食先唔肥?十種最易「中伏」嘅早餐| likemagazine.com.hk
Beauty & Health

點食先唔肥?十種最易「中伏」嘅早餐

早餐係每日能量嘅泉源,但係一個唔覺意「選擇錯誤」,日日食就好容易搞到糖份熱量超晒標?營養學家 Mandy Wong 就為大家解說10種「最易中伏」嘅早餐,唔知你又係咪日日食呢啲?

---------------------------------------------

乳酪Yogurt
乳酪總給人健康、護腸嘅感覺。不過,你有無留意你揀個杯乳酪係咪真乳酪?同埋有無留意其糖份量有無超標?


乳酪可以係高蛋白、低脂食物之選,但同時可以中哂伏。如果你揀咗以下乳酪,高糖兼唔夠一餐蛋白質所需,就唔好問點解食極乳酪都唔瘦,一啲都減唔到肚腩啦!

圖片來源:《飲食陷阱》

即沖燕麥片
燕麥出名係有助降膽固醇嘅食物,而且飽含纖維,早餐食「麥皮」實健康!
但加入調味嘅即沖麥片,就唔同講法。就以下面例子為例,排第二嘅成份係植物奶精,所以一包35克嘅即沖燕麥片已有一茶匙油份。值得注意嘅係4.4克脂肪中有3.1克,即係有70%係屬會增加壞膽固醇水平嘅壞脂肪。以為食「麥皮」可以降膽固醇,點知,食錯麥皮反而會增加壞膽固醇!

加入植物奶精,壞脂肪含量也增加!

饅頭
一個大饅頭(130克重)大約有350卡,以熱量去睇,唔算高,但係如果你真係食個饅頭就當早餐。咁我可以話你知,你一定、一定、一定唔會瘦。只係睇熱量計數可能唔超標,但係饅頭全部都係carbs (碳水化合物)! 而且,淨係食饅頭會欠缺足夠蛋白質,長遠嚟講,咁樣當一餐,只會增脂減肌!嚴重啲講,會影響埋新陳代謝。

白粥配炒米粉
食白粥實無乜油,心諗,配碟炒米粉都唔過份。但你有無留意粥同米粉有一個共通點,就係兩者都屬碳水化合物。之前係《飲食陷阱》分析過,白粥配炒米粉,加加埋埋有成約140克碳水化合物,等同食兩碗半飯無異。

圖片來源:《飲食陷阱》

排包
貪方便,只食排包當早餐,點知食完兩片麵包都好似食咗一陣風,一啲都唔飽,但就已經攝取咗250卡,大半碗飯嘅澱粉質加1.5茶匙油份。最弊就係,食完兩塊過個零鐘之後覺得唔夠飽,又去食多兩塊包!

圖片來源:《飲食陷阱》

梳打餅
肚餓總會諗起食梳打餅。但如果你有睇過《飲食陷阱》,就會知道梳打餅有幾伏!以白麵粉製成,屬高升糖指數食物之餘,又唔飽肚。最㢢就係揀錯餠,分分鐘一包餅仔就已經有1.5茶匙油份。

 

圖片來源:《飲食陷阱》

低脂朱古力奶
趕住返工,諗住飲奶又有蛋白質,又係健康食物,咁就是但係便利店買包奶頂住檔先。如果你認為低脂實無錯,點知揀咗包糖粉爆高嘅牛奶飲品,咁就攝取咗22克糖,即係差不多4.5茶匙糖!而且蛋白質也只是攝取咗真牛奶嘅一半!

英式鬆餅Muffin
好多時coffee shop 都會有muffin嘅選擇,如果你是但買杯咖啡(含糖及奶)加個muffin,閒閒哋呢一餐都有成600卡。
唔好睇少一個muffin,都已經有約400卡及3茶匙油份。如果你揀得邪惡少少,揀個朱古力味,熱量及糖份會再高一啲。

腸粉
白朦朦嘅腸粉屬高升糖指數食物,容易波動血糖升幅,導致食完早餐仍然覺得「眼訓」。加上,由米漿製成嘅腸粉欠缺足夠蛋白質,令人容易肚餓。
如果食腸粉喜歡混醬食,每湯匙麻醬已有近100卡,甜醬也有30卡,每樣加兩匙,就已經唔覺咁攝取一碗飯嘅熱量。

魚肉燒賣
買腸粉嘅地方,通常都會有魚肉燒賣。別以為魚肉燒賣全是魚肉,更多的其實係「肥肉」。一串就已經有294卡,脂肪含量更有13.7克!如果成日食好似以下咁嘅早餐,以為好輕食,點知仲肥過食份三文治加杯無糖豆漿!

---------------------------------------------

授權轉載自 營養學家 Mandy Wong


Mandy Wong, 任職營養學家,以「營養共享」為理念,積極推廣健康飲食。不著重食物的「卡路里」,只講求食物是否合「營」合「理」。把營養學的概念深入淺出,教大家如何吃得活得更MINDFUL。
Facebook: https://www.facebook.com/pg/Nutritionist.Mandy


原文連結:
https://www.askmandywong.com/2018/10/20/breakfast_trap_a/
https://www.askmandywong.com/2018/11/03/breakfast_trap_b/

相關文章
執笠倉尋寶好物推介│貓爪按摩棒消酸痛減腳腫執笠倉尋寶好物推介│貓爪按摩棒消酸痛減腳腫 新年暴食飽滯肚谷│4招舒緩飽滯不適新年暴食飽滯肚谷│4招舒緩飽滯不適 冬天瑜伽|懶人暖身教學 冬天瑜伽|懶人暖身教學