哈囉喂率先睇搞乜鬼| likemagazine.com.hk
Special

哈囉喂率先睇搞乜鬼

中國鬼門關未閂上,慶祝西洋鬼節的活動急不及待出籠,搶先公布的有海洋公園「哈囉喂全日祭2017」!玩咗咁多年,其實乜鬼都玩過,乜鬼都出動過,今年11個鬧鬼熱點,當中不少元素有「炒冷飯」之嫌,新鮮感欠奉,但要求驚嚇的話,都有一定程度滿足。今期率先同大家披露其中3間鬼屋玩邊科,打算入場玩又細膽的你,有準備唔使心慌慌!

 

你係咪夠「殭」先?
東方鬼怪之中,殭屍是經典中經典。一身唐裝,目無表情,失驚無神彈彈下出現大家眼前,已經令人毛骨悚然!今次海洋公園還將整個殭屍墓塚搬來,即使你夠薑,都未必夠班殭屍鬥!在「殭屍森塚」裡,屍氣濃烈,要逃出森塚,記著一招:「一鼓作氣」,見殭過殭,殭屍都無你符!

咪見到道士先生以為有救,睇真啲,佢未成功收拾殭屍已經成為殭屍一分子。
傳聞被殭屍咬過會變殭屍,呢位女士睇來正中殭毒!
殭屍不動,不等於安全,小心突襲!
朋友, 唔夠薑,咪搞殭屍呀!

 

港味窄巷心慌慌
每到鬼節,坊間便會重提某年某月某日香港某個陰森角落發生的嚇人事件。有人話,一些烏煙瘴氣、不見天日的地方特別聚陰,所以陰靈妖怪老是常出現。香港地曾經有個地方叫城寨,是個三不管之地,人流複雜,內裡九曲十三彎,城外人入到城如走進迷宮,難辨東南西北!這個名為「城寨驚魂」的鬼屋,擺明玩港味,勾起大家的集體回憶,同時藉著城寨的陰森、暗黑,等大家可以同鬼怪惡靈近距離親親,玩埋「捉伊人」!

城寨內,被鬼迷的狂徒隨時出沒,路上小心!
黃綠牙醫醫死人,做了鬼繼續嚇人!

 

「慌宅17」心理交戰
提起鬼神,好多人即時搬出一句老土話:「平生不作虧心事,夜半敲門也不驚」,但真的嗎?驚恐,有時是自己心理作怪,未必與鬼有關!在「慌宅17」內,大家通過不同的考驗,可睇真自己最深藏的一面,測試自己的心理有幾強!入屋的玩家會被分為小組,進入8間慌室,每間各有主題,挑戰五官忍耐力!今次預覽的兩間慌室,一間玩視覺核突,一間玩觸電和高音頻,驚嚇度高與低,完全是個人心理交戰的結果!溫馨提示,想玩呢間鬼屋必要預約,名額有限,先到先得。

牆上滿是電掣,運氣不佳,即觸電!
睇見呢位滿身濃胞的肥叔叔已經起雞皮全身震, 更何況要挑戰心理極限,吞下從佢身上刮下來的膿液(其實係芝士忌廉),難怪現場驚叫聲四起!

 

INFO
「哈囉喂全日祭2017」
日期:公眾入場10月5-8、13-15、19-22、26-29及31日
時間:早上11時至晚上11時
門票:海洋公園日間門票成人$438、小童$219;哈囉喂普通門票成人$538、小童269;哈囉喂優越門票成人$800(繁忙日子$900)、小童$400(繁忙日子$450);網上購票優惠享95折;全日制學生逢星期四、五及10月31日8折買當日門票
網址:www.oceanpark.com.hk

TEXT ﹠ PHOTO:黎力勤

相關文章
聖誕好節目 派對好易煮 合家歡遠足路線推介 優質家居好物推介 美酒月,飲杯啦! 老夫子Forever Young 好玩Party籌備Tips 月下識食兩團圓