戀愛蜜語 杜小喬 王敏奕| likemagazine.com.hk
Cover

戀愛蜜語 杜小喬 王敏奕

初戀是甜蜜的、青澀的、難忘的、痛苦的。王敏奕和杜小喬因為電影《初戀日記:賤男蜜擾》重返校園,走過熟悉的班房、操場,勾起那些年的開心無憂讀書片段,也回想起情竇初開的苦與甜。

 

L:Like Magazine
王:王敏奕
喬:杜小喬

L:可以分享一下讀書時代的戀愛回憶嗎?
王:Puppy love囉,都係打打鬧鬧,唔知係咪一齊,但又喺埋一齊,好多時渾渾噩噩就過咗。
L:有試過主動出擊嗎?
王:冇,戲入面係男主角鍾意我!我自己未試過主動出擊,因為愛情是雙方,大家都鍾意先能夠成為愛情。
喬:黄安宜(戲內角色)有個男仔好鍾意佢,但佢自己鍾意另一個男仔,由中學到出社會做事,一路長情鍾意另一個男仔。我讀書時拍拖都係咁,第一次拍拖拍咗8年,經歷令我代入到角色。戲內黄安宜最後無同個男仔一齊,我自己就有同個男仔一齊,不過佢對我嚟講係個賤男。細個拍拖唔識咩係真正嘅愛,淨識付出,完全就晒佢,但其實咁樣唔係鍾意,唔係愛,係愚昧地單純付出。
王:初戀因為乜都唔識,當鍾意一個人會盡量令佢開心。我試過初戀時親手織頸巾送畀佢,但佢下個星期已經唔見咗,當刻好唔開心,因為我由唔識織到識織,覺得自己好大付出,點知佢會隨手丟咗。
喬:初戀好似都要經歷痛,要傷心。
王:都有成功例子,我有朋友由初戀拍到結婚。

 

L:你為男朋友做過咩窩心事?
煮嘢食。當時自己唔係咁叻上網,或者因為我比較「摺」,要周圍搵好多食譜,又要諗佢鍾意食咩菜,準備一大輪,好期待,點知佢隨便撩幾下:「OK啦!下次唔使咁辛苦。」唔開心感覺會記得好耐。佢(王敏奕)就唔同,佢長期處於BB狀態,好錫好錫男朋友,超sweet嘅女仔。
L:點錫法?
王:都係嗰啲,你開心我又開心嗰種。
L:即刻閘住唔畀小喬講?
喬:超錫男朋友,在片場長期掛住男朋友,無論拍劇前拍劇後背緊稿都會有電話。睇得出男朋友勁錫佢,長期keep住關心佢。

 

L:好多長輩話讀書唔好拍拖,你哋點睇?
王:去到我年代已有電話,同學與同學之間溝通很方便,或者未必要出街拍拖,可能message已經感覺同一個人connect到,最緊要唔好影響到學業,balance到,自己責任做好,其他是心靈慰藉。
喬:認同。成日聽媽咪話細個唔好拍拖,但現時佢成日叫我去拍拖。細個拍拖最重要知道有人愛,同埋愛自己。你唔識得愛自己係唔會識得拍拖,你無可能將真正的愛表達出來。拍拖要知道自己嘅定位。
王:要有底線,唔好畀人傷害,拍拖都係學習。

 

L:分享一下你嘅戀愛招數?
王:唔好即刻覆電話之類?戲內有段戲係教女仔扮傻,因為男仔好多時唔在意你講乜,如果你顯示出好欣賞嘅眼神、好崇拜佢,佢哋會覺得飄飄然、好冧。
L:私人招數呢?
王:順其自然。每個人鍾意嘅嘢唔一樣,如果你要搵一個方法就佢style,唔會就得好耐,你會覺得唔舒服。最重要係搵到一個鍾意你as你自己嘅人,自然地做番自己,你個心又錫佢。重要係……唔好鬧人囉,我覺得女仔最輸蝕係鬧人,令人覺得好煩。
佢真係溫柔。
L:小喬,你從錯誤中學習?
喬:我以前成日會諗對方先過自己,原來咁係唔啱,你要講畀對方知你想要乜,因為兩個人相處唔係得一個,如果你將自己的重點放在對方身上,佢都會覺得辛苦、大壓力。兩個人磨合到咪繼續一齊,磨合唔到搵方法,真係搵唔到方法,只可以話未啱住。

 

L:男仔有乜行為會加分,會冧到你?
喬:我「M到」會特別忟憎,若果佢用平淡語氣講:「得啦,我都明,你係咁㗎啦!」已經好窩心。我試過有個男朋友,佢好到幫我買M巾,佢唔知我要咩牌子和款式,於是逐個款買,一個男仔去買女仔用品的地方,我相信佢會尷尬,被人投以奇怪目光,但佢都肯為我咁做,幾sweet。
王:我自己做演員有低潮時,會諗多咗,感情太多,唔開心,佢會喺你覺得煩時講句:「喊完覺得舒服啲?」即使當時自己重喊緊,但真係舒服咗。

 

我們眼中的賤男
杜小喬:明知佢鍾意你,但你無辦法付出同等分量嘅愛,又吊住佢癮,唔畀佢走。


王敏奕:唔識珍惜你,會做啲事傷害你,「老馮」要女方付出。

 

TEXT>黎力勤 PHOTO>Johnson   
Credit>
王敏奕:Onetung Ma(Make up)、Eas Fu(Hair)
杜小喬:Hana Ho(Make up)、Vincent S(Hair)、Moussy & Sly(Dress)

 

 

相關文章
森系自然風 婚紗從簡 健康初味 六千嵗冷壓初榨野生山茶油 皮革護理專家鄭卓峰博士 皮具有情 行善堅離地 發現.伊朗 輕鬆煮賀年菜 鹿兒島療癒身心小旅行 10月飲勝狂歡!