覓食Online - 日本水果篇
水果兄弟 直送揀手日本水果
多數人買日本水果，主要在幾間高級超市入貨，不過超市水果擺放出來任人揀，忙於工作的人未必有閒暇去慢慢挑慢慢揀，結果未能買到最好的貨色，嚐到最好的滋味。在facebook專營高質水果速遞的「水果兄弟」，因拍檔之中有人是水果入口商，能夠取得日本當造水果首批貨，由於水果質量高價錢合理，故此公司成立以來吸引很多誸飲又識食的人幫襯。
負責人Cyrus表示，青森縣蘋果算是公司吸客最強的水果。「青森縣出口蘋果數量全日本最多，而且品種多，幾乎每個月都有不同品種的蘋果推出。我們的拍檔與日本青森縣的農場及政府單位有交流聯繫，所以能取得靚貨。現在當造的是王林蘋果，又大又甜又多汁。」踏入冬季，當造的還有士多啤梨。「12月近聖誕左右，是當地士多啤梨當造最靚的時候，由於士多啤梨儲存期短，約3至5日，我們只會加密返新貨，但絕不囤貨，保證新鮮。」水果兄弟出售的水果，均以空運直送香港，一般而言，由農場摘下至入箱上飛機到香港，約1至2日，水果訂單即日落即日送，買滿$500免費送貨，即使偏遠地區如東涌、馬灣等，只象徵式加收$50。售價方面，比超市約平10%。「我們的水果送到香港後，一直放在雪櫃裡保鮮，唔似得超市或水果店將水果擺出來，因為氣溫變化、陽光等都會影響水果的新鮮程度。」他又表示，為保證出售的水果必為佳品，省靚招牌，不設預售水果。「之前有批北海道士多啤梨，貨到後我們試食，發覺唔太好味，所以成批貨無賣出街。水果唔同其他貨品，受天氣、環境等影響，難保證每批貨的質素。」
10大熱賣水果推介（價錢按貨源有機會變動）
1 靜岡縣紅臉士多啤梨$158 / 1包(約320g)
每年12月至4月，靜岡士多啤梨當造的季節，不但夠大粒，味道又香又甜，而且甜得來不膩。DX級，揀手靚貨，回味無窮。
2 和歌山縣「最高傑作蜜柑禮盒」$250 / 1盒(15個)
和歌山特產，香甜冇渣多汁。禮盒包裝非常精美，還要每個用和紙包裹住，送禮夠得體。
3 大分日田新高梨（特大裝）$220 / 2個
Size大過成年男生的拳頭，分量十足，1個夠4個人分來食。超多汁，但果皮有點硬和粗糙，食時要先削走。
4 長野天之嬌女小蘋果 $68 / 1盒（約15至18個）
賣相的骰，大小比5元硬幣再大一點。產期短，只約1個月。味道微酸中帶甜。
5 岡山晴王青提禮盒（秀）$200 / 1包（約630g）
近年漸多港人追捧，甜度約18至20度，味道超甜。大粒，皮薄，口感好。
6 島根西條柿乾$68 / 1包（3個）
雖名為柿乾，但實為半乾濕狀態，甜味重，入口有點黏牙感，可當甜品食，保存期約半個月。
7 和歌山黑芝麻柿（秀） $500 / 1箱（12個）
和歌山是日本全國出產柿的No.1。柿果飽滿肥美，扁平呈正方形，切開柿肉，內裡滿是芝麻般的黑點，皮薄無核肉腍嫩滑，口感綿密順滑，高糖度，爽脆多汁。
8 沖繩手撕菠蘿$125 / 個（約700g）
切開菠蘿頂後，可逐粒「釘」搣出來食，連芯都食得。果肉味道清甜，不用預浸鹽水。
9 香川縣金奇異果禮盒 $480 / 盒（8個）
體積比常見的奇異果大一點，口感和味道OK，勝在禮盒包裝，而且是日本水果，質量有信心。
10 山形王林蘋果$76 / 4個（每個約320g）
產季由10月起，賣到下年都有。這幾年較普及，果味香濃。
Info
水果兄弟
facebook:hkfruitbrother
Text/ 黎力勤 photo/ 部分由相關單位提供