美酒月來喝吧!(德國啤酒節篇)| likemagazine.com.hk
Special

美酒月來喝吧!(德國啤酒節篇)

10月,酒迷開懷暢飲的時候。先有德國啤酒節作頭炮拉開序幕,再有全港九餐廳酒吧自設美酒推廣活動接棒,還有香港年度盛事─美酒佳餚巡禮推波助瀾,好杯中物的人一於約埋好友乾杯盡興;不會飲的也可趁著酒天酒地的氛圍,開心一下!温馨提示,品酒要量力而為,適可而止,切勿酒後駕駛!

 

Cheers! Oktoberfest
講起香港「飲」壇盛事,不得不提馬哥孛羅德國啤酒節。唔經唔覺,活動到今年踏入第24屆,唔止歷史悠久,重要愈搞愈盛大,一年比一年旺場。記者親身去體驗過,絕對推介,因為無論你識飲唔識飲,一樣玩得開心。最正係有得飲有得食有得玩之餘,重有世界數一數二靚海景─維港夜景伴住,180度任睇,平時自己去酒吧飲都無咁靚view!若以平日價最低消費,即成人門票$150包1杯啤酒計,抵到爛!

維港夜景下,吹住海風,齊齊舉杯飲,氣氛一流。

場內供應的傳統德國美食款式選擇多,賣相食味都吸引。


馳名的德國麵包圈,鹹鹹地,送啤酒最啱。

熱葷以外,甜點一樣出色。

 

今年活動為期23天,由10月16日至11月7日舉行,由1994年開始每年都在啤酒節中演出的慕尼黑樂隊,將繼續每天登場。話晒演出咁多年,呢隊樂隊可以話摸清香港人慢熱脾性,識得點樣搞氣氛,載歌載舞唔在講,又會拎埋德國傳統樂器長號角出嚟吹奏,同大家玩遊戲,又教大家跳雞仔舞、啤酒競飲等,就算你份人幾冷靜被動,都會被感染,high起來!

話明係啤酒節,「主角」啤酒是焦點所在,今年換上擁有129年歷史德國傳統小麥啤酒Erdinger,啤酒以古老香檳式釀酒法來釀造,入口清爽,泡沫順滑。活動期間,大家可以盡情飲到品牌兩大名酒─經典小麥啤酒Erdinger Weissbier和小麥黑啤酒Erdinger Dunkel,另外必要一試係限定釀製Erdinger Oktoberfest,呢款啤酒1年只釀1次,金黃色澤配上豐富細膩泡沫,麥香味外帶有輕微果香,好飲!有德國靚啤酒,不少得德國美食。真心講句,現場供應的德國傳統美食水準不錯,最具代表性的燒豬膝、紐倫堡式肉腸、大大件三文魚扒、重磅燒雞、香燒羊髀,甚至甜點如:德國芝士餅、蘋果酥等,應有盡有。雖然睇價錢,每款熱葷至少百幾元,甜品每款索價八十多元,不過分量好足料,幾個人夾埋叫幾款share,一定食得飽!提提你,凡於10月16至27日以成人票入場,可獲抽獎機會,有機會贏取德國漢莎航空雙人來回德國商務機票或餐飲禮券。

在今年馬哥孛羅德國啤酒節裡,大家可以暢飲經典的Erdinger白小麥啤酒(上)和黑小麥啤。

限定Erdinger Oktoberfest,1年只釀1次,必試。

點解德國人揀10月豪飲啤酒慶祝?
好多人奇怪,1年有12個月,點解德國人要揀10月開宗明義大飲特飲啤酒呢?當然與德國一段歷史有關。話說在1810年10月,巴伐利亞王子和薩克森國公主大婚,當地人為慶祝,舉行盛大啤酒節,自此習俗便保留下來,每年到了9月下旬至10月上旬,德國人就大條道理約埋好友飲啤酒,雖然平時都係咁飲,不過這段期間會有不同活動助慶,總之大家玩得開心好有fun。

Info
第24屆馬哥孛羅德國啤酒節
日期:2015年10月16日至11月7日
地點:尖沙咀海港城馬哥孛羅香港酒店6樓海景露天廣場
時間:星期日至四晚上6時至11時;星期五及六晚上6時至11時30分
票價:星期日至四,成人$150(包啤酒1杯),小童$120(包汽水1杯);星期五及六,成人$260(包啤酒1杯及紀念啤酒杯1隻),小童$160(包汽水1杯);10月30及31日,成人$280(包啤酒1杯及紀念啤酒杯1隻),小童$180(包汽水1杯)
網址:www.gbfhk.com
查詢:2113 3217

 

text/ 黎力勤     photo/ 由相關單位提供

sex stories in hindi myjustliving.com sex stories older woman teenboy
相關文章
周末親子住酒店 母親節表心意 捐贈跑Tee減廢送暖 升級家居 時裝毒害地球 復活節親子活動提案 執靚間屋雜物ByeBye 多謝支持! Like Magazine 5周年