Forever Girl 少女標本| likemagazine.com.hk
Cover

Forever Girl 少女標本

近期多間紙媒倒下,有人分析這是娛樂圈已死累事!曾幾何時,加入娛樂圈被視為掘金良機,今時今日卻被嘲送死。不過你睇淡時,有人依然我心不死。由4位不同特質女生─許雅婷(Kabby)、簡淑兒(Jessica)、袁紫僑(Coco)和溫心(Swan)組成的「少女標本」(訪問當日Swan身在內地工作),大賣少女獨有的青春氣息。少女心事引人入勝,少女清純形象好煞食。雖然事業剛起步,卻對未來雄心萬丈。今時今日在香港樂壇當歌手難,組團的更難。她們能否改變生態,讓時間作證,不過有心總要支持!

 

「少女標本」名字之謎
同事知道記者要訪問「少女標本」,即說:「係咪台灣……」「唔係,香港組合,今年新出道。」不下幾次回答同一條問題,可想大眾同樣疑惑。隊名是榮辱歸屬感之始,Jessica坦言:「初時好抗拒,好似抄人咁。」一樣的名字,但不一樣的人物組合,雖然有「攞人著數」之嫌,但至少引人注意。「開始宣傳時,好多DJ都話好深刻,見到呢個名都想知我哋係咩人。」Kabby說。新人是白紙,用名字聚合焦點,橋唔怕舊最緊要受。Coco指:「10年前的事已經夠喇,我哋重新開始,希望大家有興趣認識我哋多一啲。」

 

最熟悉的有共鳴
這些年韓潮入侵,韓團人氣急升,廣東歌影響力走向夕陽,被新一代嫌棄遺忘。Kabby說:「好多人覺得韓國天團好睇,點解大家唔睇番香港呢?我哋係香港人,喺香港發展,咁係咪應該為香港樂壇做啲可以代表到香港嘅嘢呢?廣東歌好重要。」少女標本豪言要多唱廣東歌,重振廣東歌熱潮,她們深信,最熟悉的最容易引起共鳴。Jessica分享說她向有cap歌詞與人分享的習慣,「希望我嘅歌可以令人有感受有同感。」早前有粉絲把她的歌曲《留一線》一句歌詞「忙一點,傷口好得快一點」傳給他人,叫她感興奮。Coco則想通過歌曲發放正能量,新曲《幾百萬份之一》就是傳遞人人獨有,鼓勵大家不要被別人批評所影響。至於Kabby,自評是「阿愁」,將主力唱慘情歌,「我首歌《人魚之丘》雖然令人憶起自己悲慘的過往,但人有唔開心先識珍惜開心,都是好事。」

 

豪言:進軍全世界
談及未來發展,少女標本曾在其他訪問中,豪言要進軍全世界,她們掩笑解釋只是當時快人快語,但Jesscia搶著回應:「之前在日本工作,有主持介紹我在香港做女子組合,類似AKB48之類,觀眾聽後反應大,『噢,卡娃衣呢!』然後衝過來同我影相。」她們笑言未來可認真考慮出征日本;另一隊員溫心是內地人,可以著力開發內地市場;Coco是澳洲華僑,當地朋友多,澳洲市場就由她負責。幾個女生笑笑說說樂上半天,少女純真,就係咁簡單囉!

 

粉絲追問…
1. 你通常在邊區出沒,有機會「野生捕獲」你?
2. 你最想粉絲同你講嘅說話?
3.  你覺得自己邊部分最誘人?
4.  你有冇特別僻好 /  不為人知的小秘密?
5.  你想你另一半有乜才華?

Kabby
 1. 旺角,差不多每日都去做瑜伽,通常下午出沒。
 2. 「我會對你永遠不離不棄!」希望無論之後演藝生活係點,佢哋都支持我。
 3. 招牌笑容。我有2個梨窩和有1個酒窩。每次我笑就無晒眼,個口好大,唔顧儀態,fans最鍾意捕捉我呢啲樣。
4. 鍾意自己一個睇戲,咩戲都睇,因為唔鍾意睇戲被人騷擾,唔鍾意同唔係好理解套戲嘅人一齊睇,我會好忟。通常睇早場。
5.  識飛,可以帶我四圍自由飛,哈哈!希望佢識唱歌,𠱁我,我鍾意聽人唱歌,當然要好聽,有精湛歌藝,去到《我是歌手》水平,鍾意佢憑歌寄意。

 

Jessica  
1. 冒險樂園,我鍾意玩籃球機,一唔開心就會去玩,通常去九龍區,會揀high score低啲嘅機挑戰,我通常玩到3百多分。
2. 「鍾意聽你唱歌!」證明佢哋有做功課,唔係淨讚靚咁簡單。
3. 未曬燶之前係膊頭,線條幾好,著衫好睇,有段時間我鍾意著跌膊衫,依家似燒燶雞翼,哈哈!依家鍾意腳,比例長啲。
4. 鍾意玩有速度感嘅活動,例如小型賽車、Buggy jump、Snowboard。好想試房車賽車,好似好好玩。
5. 淡定,好似陳豪咁,你問佢乜都笑笑口,就算唔想答都笑住對你,唔會黑面。我份人易緊張,驚到聲到震,身邊人淡定會畀到我安全感,但唔可以大男人。

 

Coco
1. 梗係動物園,哈哈!我神出鬼沒……《今晚睇李》囉!將軍澳堆填區,電視錄影廠, 1星期我會返去3日,全日,試過幾次有粉絲在外邊等,我知道會出去同佢哋影相。
 2. 「你今日好靚!」聽到我會好開心。粉絲同我咁講,聽完後我會諗:「咩我咁膚淺?哈哈!」
3. 人魚線,我天生有腹肌,唔做運動都有線條。我喺屋企鍾意著短褲,扭身扯出條線影相。好多人唔信我有。
4. 鍾意聞嘢,例如頭髮、拎住本簿會聞下紙張、入油會聞下氣油味、油漆、指甲油、化妝品,咩都聞一餐,鍾意味道帶來想像。最開心係聞氣油。
5. 鍾意佢唱歌好聽,好似蕭敬騰咁,把聲沙沙哋,有性格和個人style,聽到我會將佢把聲想像成super hero畫面。

Text•Lilian    Photo•ICC 
 Venue•Party Monsters (Tel:3460 4884) 

相關文章