健康誤區慎入| likemagazine.com.hk
Beauty & Health

健康誤區慎入

健康人人都想,坊間流傳的方法亦有好多,不過有唔少都係有人一知半解以訛傳訛之下傳開來,甚至變成流行健康法則,效果適得其反。想真正健康,先要有智慧地認清事實,咪跌落健康誤區!

 

食水果唔怕多?
水果含有大量抗氧化劑、維生素和礦物質,對身體益處無庸置疑,但好嘢唔代表可以濫食。有人以水果代替主食,全日由朝到晚只食水果,以為咁就可以盡情吸收天地精華,殊不知病魔已悄悄埋身。實情係水果含大量果糖,會首先在肝臟中代謝為脂肪,而太多的果糖未能全部被吸收,便會經腎臟過濾排走;因此過量食水果會造成血脂過高致愈食愈肥,還會引起消化不良和內分泌失調,對肝臟、腎臟等構成壓力,大大增加患上慢性疾病的風險。
即係咁:多食水果當然無問題,但水果當飯食就好大問題。要記住,你係智人唔係猿人,智人就要有智慧食番智人嘅嘢,人咁長命係有原因嘅。簡單講句,營養要均衡。

 

食多滴油都嫌多?
唔知從幾時開始,食用油被描繪成毒物,好些人聞油色變,食乜都要走油,煮餸通通唔落油。這種盲目誤信的情況實在有損智人威望。常識話我知,油係身體不可或缺的營養素,它可以合成細胞和荷爾蒙,以及幫助吸收脂溶性維他命,這些人體必需元素若完全唔食油便難以吸收。按美國農業部建議,成人每日應攝取5至7茶匙油。咁當然唔係叫你用羹食,因為在日常飲食中,好多食材已經含有油的成分,只是食菜就要落點油;所以西方人食沙律會落橄欖油或沙律醬,除咗好味之外,最重要係有助營養吸收。
即係咁:油有好多種,最基本可以分動物油和植物油,也可以用飽和脂肪同不飽和脂肪嚟分,無論哪一種油,食得多都係唔好,但完全唔食或者食得太單一同樣不智。講到尾仍然係嗰句:營養要均衡。

 

吃粗糧更健康?
近年粗糧風頭勢勁,不少人以糙米取代白米作主食。粗糧的好處在於含有豐富膳食纖維、維生素、礦物質和抗氧化劑,聽落都覺得健康,所以大受注重健康飲食人士歡迎。但有兩點卻往往被忽視,第一是粗糧真的太粗,粗到影響消化,慢速消化令到食物積存在胃部,增加胃酸分泌,隨時引致胃痛或胃酸倒流,還會影響其他食物的吸收。另一點更不容忽視,就是粗糧含致癌物無機砷,在穀物上,無機砷主要存在於穀糠部分,所以粗糧的無機砷含量比精製米高好多,長期大量攝入更會影響肝臟、腎臟、脾臟等器官的功能,想靠吃粗糧換來健康,結果可能得不償失。
即係咁:唔係話粗糧唔好,但食都要有個譜,完全代替白米壞處多過好處;最佳食法係兩溝,例如1 / 3糙米溝2 / 3白米,起碼食完唔會頂住個胃。都係嗰句,營養要均衡。

 

聞雞起舞做運動?
近年時興做運動,好多人喜歡跑步,有人練跑晨咁早,有人鍾意等收工,夜跑舒壓去除煩惱。晨早做運動之風由來已久,古有祖逖聞雞起舞,今有銀髮族未天光晨運散步,彷彿時間愈早空氣愈好。實情係唔係咁?其實一早一晚空氣污染最嚴重,因為綠色植物要靠陽光至可以進行光合作用,吸走空氣中的二氧化碳釋出氧氣;當太陽休息時,植物便同人一樣會吸氧和排出二氧化碳,而且晚上釋出的二氧化碳會沉積在空氣中,故晨早未天光尤其是公園山林的空氣都不好。
即係咁:晨早跑步其實確對身體好,不過唔使天未光咁早,可以等太陽伯伯瞓醒,過咗晨光第一線,植物吸走二氧化碳同放番啲氧氣出嚟至跑;如果夜跑則宜在黃昏後,記住愈夜空氣愈差,而且太夜運動會影響睡眠質素。


TEXT:八哥

相關文章
人氣網店熱搶貨 豪用不肉痛 點食先唔肥?十種最易「中伏」嘅早餐 唔好阻住你老公!男士嘅避世聖地竟然係..... 點解熄燈睇電話會傷眼?後果可以好嚴重! 秋冬保濕要用油 食啱點心都能減肥!日本大熱首選瘦身點心公開 秋冬減肥秘訣! 讓你大時大節也能食住瘦 大熱紅酒減肥法|抗氧化排毒助減肥!?