美酒當前 怎一個醉字了得| likemagazine.com.hk
Special

美酒當前 怎一個醉字了得

對酒當歌,人生幾何。古代文人雅士,泰半都是酒鬼。港人知書識禮,深受中國文化薰陶,也把香港打造成美酒之都。當此10月之際,既有德國啤酒節,復有美酒佳餚巡禮,再有11月國際美酒展,彷彿為酒神戴奧尼索斯舉行祭禮。參加酒壇盛事,好多時都是與愛侶把臂同遊,良辰好景當前,浪漫滿溢之際,怎一個醉字了得。想飲唔想醉?當然有計。

 

入場先打底
美酒當前,千杯嫌少,卻也不能次次不醉無歸,否則好快返歸。想無咁易醉,第一步是打底,因為酒精是經小腸吸收後進入血液,空肚飲酒幾乎是直入到小腸,所以先要吃點東西,阻慢酒精吸收,唔怕肥就吃個菠蘿油或鮮油多,又或肉類等含脂肪蛋白質的食物,晾一晾個胃。

 

飲多杯—水
入場首先要做一件事,就係留意洗手間位置。點解?因為想無咁易醉,另一個方法就係不斷飲水,將酒精沖淡,同時加快新陳代謝,未吸收已經排走,咁就可以飲多兩杯。所以入場記得帶樽水。

 

同另一半share
美酒佳餚巡禮設有品酒證,如果想試多幾款佳釀又怕飲得太多,何妨與另一半share,一杯兩份飲,飲少一半但試多一倍,點計都划算。而且你一啖佢一啖,更添浪漫情趣!

 

唔好下下乾杯
參加這類盛事,最好預多一點時間,時間充裕就唔使咁急慌死趕唔切飲唔夠喉。要知愈飲得急愈易醉,而且飲咁快就如牛𡁻牡丹囫圇吞棗,失去品酒的意義。不如放慢腳步,細意品嚐,享受箇中樂趣。千祈唔好下下乾杯。

 

少飲氣泡酒
氣泡酒易入口,很受女士喜愛,也很容易飲多咗,到發覺唔對路往往已經遲咗。要記住氣泡酒中的二氧化碳會加快胃部吸收乙醇的速度,如果溝埋酒就更快上腦。而且氣泡會頂住個胃,令人更加易嘔,大庭廣眾,無謂啦。

 

美食都係重點
入場咪淨係掛住飲,別忘記這類盛事另一焦點係食。有飲自然要有食,而且大會安排的美食吸引力不比美酒底,天上的地下的海裡的通通都有,所以大家應該早一點入場,時間流流長,慢慢飲慢慢食,玩足全日至盡興。

 

順道分享交梳
美酒展隨了畀酒大家飲,其實都係一個推廣酒文化和交流的機會,大家可從中認識不同品種不同產區的美酒,順便向在場專家請教,活動還有不少講座和分享會,可以話係增長知識的良機。只要唔係淨掛住飲,咁又點會醉呢。

TEXT:八哥

相關文章
聖誕心意煮意 YouTuber Melo分享:網店賣衫 影靚相吸客 秋遊離島 酒月狂歡 時裝醫生為舊衣應診 超級瓔珞 好睇唔好學 美。好家居 迪士尼詭異萬聖派對