冷氣慳住歎| likemagazine.com.hk
Special

冷氣慳住歎

炎夏最大用量的是電力,皆因日日熱到卅幾度,在狹小居住環境中唔開冷氣實在無覺好瞓。既然無辦法唔開,就要開得精明些,慳錢同時慳資源,何樂而不為。

買冷氣要買變頻機
如果你打算換冷氣,無論幾多匹,獨立定分體,記緊要買變頻機。原來冷氣製冷要靠一個壓縮機,傳統定頻冷氣的壓縮機轉速是不變的,所以要不斷開和關去調節室內溫度,消耗很多電量。而變頻冷氣的變頻器可改變壓縮機供電頻率調節轉速,從而控制室溫,大大減低耗電量,達到節能的效果。

同時開風扇
有些人喜歡開大冷氣蓋上厚厚的冷氣被睡覺,話咁至舒服。中醫話唔流通的冷風屬於邪風,會令經絡閉塞,所以唔好以為愈凍愈舒服,其實剛剛相反,耐咗你就知味道。所以夜晚瞓覺冷氣溫度不宜調高,只要在房內加開風扇,令空氣循環流通,冷氣吹出的涼風很快便均勻走遍房間,令你感覺舒服。

清洗隔塵網
可有覺得冷氣無風唔夠力?其實清洗隔塵網好重要,一來風力無阻更有勁,開細啲已經足夠,而且減少塵埃積聚,空氣都好啲。很多人一聽見洗冷氣就怕怕,以為又要花幾百,其實洗隔塵網好簡單,打開個蓋抽出過濾網,用吸塵機又好,用花灑沖又好,幾分鐘就搞掂,每個月清理1次,個網無塵,吹出啲風都更宜人。至於搵師傅來徹底清洗,一年1次就夠了。

記得校時間掣
其實瞓覺開冷氣不用開足一晚,因每日黎明前的兩三小時是全日溫度最低的時候,即使日間卅幾度,到凌晨4、5點都會跌至25、26度,室內外溫差不會很大,即使關掉冷氣也不會突然變熱,只要有開風扇,就可以一覺瞓天光。

吹冰?算吧啦!
有人教話雪大冰用風扇吹代替冷氣,如果你真係想試就要諗清楚。首先,冰可以維持幾耐至融晒?天氣咁熱,頂多咪幾十分鐘,幾十分鐘的冰風頂唔頂到天光你自己諗嘞。重有,用盆載住大冰,個盆邊在冷熱溫度之下一定會滲到一地水,你擺把風扇在冰附近,滲出的水就會流到去風扇度,搞到漏電就大件事。

配合冷氣小貼士
窗口向西記得落窗簾
正所謂買樓要買向南樓,如果家中窗口向西食正西斜,成間屋就好似蒸籠一樣。所以返工臨出門口記得要落窗簾,否則放工返到屋企開行冷氣都有排散唔到熱。

久違了的蓆
重記唔記得細個屋企無冷氣瞓覺有乜法寶?竹蓆草蓆是也。不過自從有咗冷氣,大部分人都遺忘了這傳統法寶,其實不知幾咁環保。

不要沖完涼即瞓
你有無試過,夜晚去完街原本好眼瞓,不知幾想唔沖完涼即刻上床,點知沖完涼後睡意全消鬼打無咁精神。當然了,沖涼會加速身體血液循環,唔單止個人精神咗,而且全身都熱咗,這情況下立即上床非但無咁快瞓著,重會愈瞓愈熱,愈熱又愈瞓唔著,冷氣開到幾大都無用。

TEXT:美斯

相關文章
開學Get ready 時下流行Pre-wedding婚紗款式 炎夏大曬 2018至Like品牌大獎 8大品牌實力取勝 V10 Plus - 2018至Like肌膚營養品牌大獎 卓峰皮具護理專門店 - 2018至Like皮具護理品牌大獎 Skin in Balance - 2018至Like天然護膚品牌大獎 Pure Derma - 2018至Like星級美容品牌大獎