私心推介:搵食呢度| likemagazine.com.hk
Shopping

私心推介:搵食呢度

香港人由細到大食得好,環球美食、山珍海錯、高級草根,乜都試過,人人自我感覺良好是食家,炫耀個人慧眼識窿路,所以講飲講食從來是樹敵的行為。不過咁,記者勇者無懼,抱著「好嘢開心share」態度,今期分享近期搵食路數。作為私心推介,至少個人覺得有值得share地方,不求他人認同。若果中你口味,歡迎去試試支持,香港地需要正能量!若不中你口味,只好講聲「唔好意思」,阻你寶貴時間囉!

 

沙田超抵食下午茶自助餐
第一間想介紹畀大家的是食自助餐。香港人對自助餐情有獨鍾,不過近年食得好一點豐富一點的自助餐,每位索價4、5、6百元,係咪抵,見人見智。記者自問是食自助餐賠本的人,生蠔刺身壽司冷盤通通非我杯茶,所以一向是自助餐稀客。但最近終於破戒,幫襯了沙田麗豪酒店意廊的假日下午茶自助餐,當然有原因。

餐廳座落在城門河畔,好天日子,落地玻璃窗採光度高,氣氛悠然舒適。

推介原因
先講價錢,每位$168,享7折,不設加一,四捨五入,實收$118,大小同價。
自助餐只供應甜品、pizza、意粉、炸物,還有幾道肉食主菜,雖然款式有限,但收費百多元算係咁。
Pizza是即製的,而且keep住有兩款不同口味,熱辣辣,批餅厚薄得宜,意外驚喜。值得一讚是pizza切得細細件,先別小人之心覺得是餐廳「度叔」,其實小件讓大家可以多試幾款口味,也減少浪費,都是德政。

Pizza切成小件,令人可以多試幾款口味。

記者當日光顧,主菜有3款:紅酒燴牛腩、白汁雞皇和燒烤醬豬肋骨,有牛有雞有豬,滿足不同口味,豬肋骨肉軟入味,牛腩夠腍,雞就不過不失。炸物當日是炸洋葱圈和芝士炸薯角,大眾口味。

燒烤醬豬肋骨肉質嫩,夠入味。

意粉只有1款,光顧當日是白汁長通粉,看似平凡,但做到al dente。

芝士炸薯角很惹味,大人小朋友都愛。

甜品款式有十多二十款如蛋糕、水果撻、啫喱、慕絲,全部是小件或小杯裝著,一口一個,多試幾個都得。心水推介是葡撻仔,甜度適中,酥皮香脆。另外,光顧當日有雪糕窩夫供應,窩夫即叫即整,3款雪糕口味選擇,餅皮外脆肉軟,味道可口。

甜品都是小件式,一口一個,貪吃可多吃幾款。

雪糕窩夫即叫即製。


自助餐包飲品1杯,建議order凍檸茶或水,用透明玻璃mug盛著,大大杯。


總評:7 / 10
坦白講,論食物質素不是豪華級,味道也不算超級好,若不太挑剔,絕對ok。而且當一般餐廳普通一個下午茶都叫價$30至$50,坐得舒服一點或有主題的餐廳,下午茶set至少$70至$80,以呢口價來講,好抵食,尤其大胃口之人。下午茶時間食得飽飽,晚飯都慳返。甜品有時有主題,聽講之前做過朱古力和馬卡龍,甜品控要留意!

INFO
「意式情迷」薄餅及甜品自助餐
地點:沙田麗豪酒店Avanti Pizzeria意廊
供應時間:逢星期六、日及公眾假期下午3時至5時
價錢:每位$168(可享7折)
電話:2132 1235


 

銅鑼灣性價比高炸豬扒
銅鑼灣雖然餐廳多,但對記者此等長期糧尾的人,總是無啖好食,平民茶餐廳一個餐幾十元,來去豬牛雞扒,多汁多油多鹽,諗起都怕;高級餐廳呢,價錢貴,分量少得不夠攝牙罅。要在呢區搵食很難,不過終於畀記者在利園山道搵到間性價比極高的餐廳─燒豕店。餐廳裝修擺設玩近期流行的懷舊,店員清一式著住黑Tee,上面有句slogan:「我們都是食豬大」,點出餐廳主打也是人氣之選—豬排。

這間店近來很火,即使臨近關門時間,仍有人排隊。

 

推介原因
出街食飯,最最討厭是餐牌上寫著:「圖片只供參考」,參考就超吸引,實物就呃人。呢間餐廳門口放有大餐牌,相中秘製豬扒豬飯超大件,未食已經口水流。到實物上枱,與餐牌相片類近,沒屈機,先畀個Like。

炸豬扒好大塊,分量十足,未食已經大滿足。


豬扒即叫即炸,店內滿是炸豬扒的肉香味。豬扒上枱時熱到熨嘴,溫提大家咪因貪食而熨傷。豬扒外層金黄香脆,肉質軟滑有肉汁,不是乾掙掙的,而且經醃製,惹味。難得是大件得來有厚度,不是坊間餐廳為將豬扒變大件而夾硬鎚鬆塊肉,變成薄片,再畀個Like。
豬扒飯主要有兩款汁醬配─肉燥及咖喱,也有期間限定的柚子蜜。記者選了肉燥,覺得是明智之選,因肉燥製作誠意可加,肉粒肥瘦有致,調味五香味濃,甚有在台灣吃到的風味。
私心建議,識食一定把白飯轉撈粗,麵條彈牙,條條分明,沒有黏埋一起,很爽,最重要是瀝乾水先拌入醬油調味,食完碗底無麵水。

識食一定轉撈粗。


豬扒以外,其他食物水準都很高。記者還試了沖繩豬軟骨飯。豬軟骨腍到無牙都食到,非常入味,讚位是伴菜的蓮藕,爽脆可口。

沖繩豬軟骨飯都是水準之作。

 

總評:8.5 / 10
在銅鑼灣區,不用$60可以食到咁大碗分量的飯,而且味道佳,值回票價!食得出是誠意製作,不是偷工減料或將貨就價。全部即叫即製(炆熬食物除外),炸豬扒需時,請大家耐心等候。餐廳近來頗火熱,記者晚上8點多來到(餐廳話營業至9點),算是次輪晚飯時間,門外仍然有長長人龍。幸而小餐廳,為多做幾枱生意求存,枱椅盡量有幾多放幾多,座位有點迫,多數食客食完即走,等候時間可以接受。

INFO
燒豕店
地址:銅鑼灣加路連山道11號地下
營業時間:中午12時至晚上9時
電話:2805 6665

 

何文田特色緬甸菜
講到食,香港人真係好幸福,環球菜式應有盡有,連偏門的緬甸菜都食得到。這間位於窩打老道的緬甸餐廳,本來是勝利道一間小小店,但因為食物有特色,而且水準不俗,不到1年便在何文田窩打老道開地舖,證明有食力一定有人賞識。店主的太太是緬甸人,會從緬甸採購食材,煮法也地道。

小舖開業未夠1年便在大街開多間地舖,有食力自有人欣賞。
牆上掛有緬甸風土人情的畫作,加深未去過緬甸旅遊的人對這個神秘國度的印象。

推介原因
必食有Mohinga鮮魚濃湯米線($48),湯底不是我們常見的奶白色,是淡黃色的,有點似喇沙,因為是用大量的鮮魚加黃薑加雞熬製。魚味濃,很鮮,絕不腥。想味道突出一點,可自行加點魚露、檸檬及辣椒片調味,更有風味。據店主分享,黃薑很有益,有增強免疫力功效。配菜豆卜吸晒湯汁,魚片則一般,精采位在附上的碗豆餅,薄脆美味,就像我們廣東人吃魚蛋麵時加魚皮,完美配搭。

Mohinga鮮魚濃湯米線必試。


緬甸風味咖喱雞撈麵($48)是店主另一私心推介,碗麵上枱黃澄澄,因為又是薑黃作怪,有益多吃無妨。雞件煮到很軟腍,筷子夾起差不多骨肉分離,伴以炸蒜片,食味有層次。咖喱很香,食得到香料的百香,有點辛辣,但愈辣愈愛,會上癮。麵是特製的,偏挺身,掛汁力強,所以啖啖滋味。

緬甸風味咖喱雞撈麵,辣得滋味。


怕辣的可以點緬甸香滑椰汁雞麵($48),是另一種緬甸風味。湯汁椰香味重,食得出落足心機煮。

緬甸香滑椰汁雞麵是不好辣的人之選。

講到緬甸菜的經典,就是緬甸特產茶葉沙律($48)。店主特別從緬甸採購經特別醃製的茶葉,加上碗豆、生菜絲、番茄粒等,加入自製羅望子汁拌製而成沙律。味道有點微酸帶鹹香,醒神醒胃,粒粒口感,有嚼頭。沙律不一定成碟係菜,食到滿口草青味,呢款就係示範。

緬甸特產茶葉沙律(前)是緬甸國菜,羅望子汁解辣一流。


飲品方面,要試試羅望子汁($20),酸酸甜甜,解辣一流。

 

總評:8 / 10
緬甸菜香港人少接觸,無往績參考,驚喜和新鮮度更高。老實講,緬甸菜偏辣,不愛辣的人可能會抗拒,但想食好西,有時要開放一點,大膽一點……或者叫定杯羅望子汁,就算辣都不怕。因為由緬甸人主理,所以食物味道較地道,未試過的值得一試。

INFO
Mohinga緬甸招牌湯米線
地址:九龍何文田窩打老道72號自由大廈地下B號舖
營業時間:中午12時至晚上10時
電話:9717 4328

 


TEXT ﹠ PHOTO:黎力勤

相關文章
CMK「您」想家居電器大抽獎 Shopping大抽獎 送150張直航機票 鞋履臭味 一噴OUT! 廢玻璃樽 巧手重生 美食共享不私藏 落雨都可以有創意!3款令人意想不到的雨傘設計 電腦節筍買正貨 韓式創意家庭料理 清新好滋味